အဆိုတော် Taylor Swift ဟာအယ်ဘမ်ပေါင်းများစွာနဲ့ သီချင်းပေါင်းများစွာနဲ့ ပရိသတ်ပေါင်းများစွာကို ပိုင်ဆိုင်ထားသူတစ်ယောက်ပါ။အဲ့အပြင်သူမဟာထပ်ဆောင်းအနေနဲ့ အင်းဆက်ပိုးမွှားလေးတချို့ကိုပါ ပိုင်ဆိုင်သွားပါပြီ။သူမရဲ့ပရိသတ် ပိုးမွှားဗေဒပညာရှင်တစ်ယောက်က သူအသစ်တွေ့ရှိခဲ့တဲ့ ကင်းနားသန်ကောင်တချို့ကို သူမရဲ့နာမည်ကိုအစွဲပြုပြီး နာမည်ပေးခဲ့တာကြောင့်ဖြစ်ပါတယ်။
ဗာဂျီးနီးယားပြည်နယ်က Derek Hennen ဆိုသူပိုးမွှားဗေဒပညာရှင်တစ်ဦးဟာ တခြားအဖော်နှစ်ယောက်နဲ့အတူ ကင်းနားသန်မျိုးစိတ်ပေါင်း ၁၇ ခုကိုတွေ့ရှိခဲ့ပါတယ်။အဲ့ဒီထဲကမှ Taylor Swift ရဲ့နာမည်ပေးထားတဲ့တစ်မျိုးက ထူးခြားတဲ့ မျိုးရိုးဗီဇရော၊ခြေထောက်တွေရောရှိတဲ့တစ်မျိုးပါ။သူပေးခဲ့တဲ့နာမည်က Nannaria Swiftae ပါတဲ့၊Swift ကင်းနားသန်လို့လည်းအလွယ်ခေါ်ပါတယ်။
ဒီလိုနာမည်ပေးရတဲ့အကြောင်းရင်းကတော့ Hennen က Taylor Swift ပရိသတ်လည်းဖြစ်လို့၊ကျေးဇူးလည်းတင်လို့လို့သိရပါတယ်။သူရဲ့ခက်ခဲတဲ့အချိန်တွေမှာ Taylor Swift သီချင်းတွေနဲ့အပန်းဖြေခဲ့ရတာကြောင့်ပါ၊အဲ့အပြင်ကင်းနားသန်တွေကိုလိုက်ရှာဖို့ ပြည်နယ်ပေါင်း ၁၇ ခုကိုခရီးထွက်တုန်းကလည်း သူမသီချင်းတွေကိုပဲ ဆက်တိုက်နားထောင်ခဲ့ပါတယ်တဲ့။
အဲ့ဒီကင်းနားသန်မျိုးစိတ်ကိုပထမဆုံးရှာတွေခဲ့တဲ့နေရာကလည်း Taylor Swift နဲ့ရေစက်ရှိတဲ့နေရာလို့ပြောရမလိုပါပဲ။အကောင်လေးတွေကို Tennessee က Fall Creek Falls ပြည်နယ်ပန်းခြံမှာ ပထမဆုံးရှာတွေ့ခဲ့တာဖြစ်ပြီး အဲ့နေရာဟာ Taylor Swift သူမရဲ့အနုပညာခရီးလမ်းကို ပထမဆုံးလျှောက်လှမ်းတဲ့နေရာလည်းဖြစ်ပါတယ်။
အနုပညာနယ်ပယ်မျိုးစုံမှာ နာမည်ရအောင်မြင်နေတဲ့ Taylor Swift ဟာသူနဲ့လားလားမှမသက်ဆိုင်တဲ့ နေရာတစ်ခုမှာနာမည်ထပ်ကြီးနေပြန်ပါပြီ။သီချင်းကောင်းတွေနဲ့ အမြဲတမ်းပရိသတ်ကိုဖမ်းစားနိုင်တဲ့အတွက်ကြောင့် ပရိသတ်တွေကလည်းနည်းလမ်းမျိုးစုံနဲ့ သူမကိုပြန်ပြီးကျေးဇူးတင်နေကြတာပါ။