Priyanka Chopra နဲ့ Nick Jones တို့ဇနီးမောင်နှံဟာ သူတို့ရဲ့သမီးလေးပုံကို ပထမဆုံးအကြိမ်အဖြစ် လူမှုကွန်ရက်ပေါ်မှာတင်ခဲ့ပါတယ်။အမေများနေ့မှာ နှစ်ယောက်စလုံးရဲ့ Instagram ပေါ်မှာ သူတို့သမီးလေးပေါ်ထားတဲ့မေတ္တာတွေကို ဖွဲ့နွဲ့ထားတဲ့စာလေးတွေနဲ့ ရေးတင်ထားတာဖြစ်ပါတယ်။အဲ့အပြင် ကလေးလေးရဲ့ကျန်းမာရေးအခြေအနေကိုလည်း အသေးစိတ်နီးပါး ပြောပြထားပါတယ်။
သူတို့ရဲ့သမီးလေးက မွေးပြီးကာစကတည်းက NICU အထူးခန်းထဲမှာရက် ၁၀၀ ကျော် နေထိုင်ခဲ့ရပြီး ခုမှအိမ်ပြန်ရောက်တာပါတဲ့။တင်ထားတဲ့ပုံကတော့ သူတို့မိသားစုသုံးယောက်ပုံဖြစ်ပြီး ကလေးလေးရဲ့မျက်နှာကိုတော့ အသဲပုံစတစ်ကာလေးနဲ့အုပ်ထားပါတယ်။
သမီးလေးအိမ်ပြန်ရောက်တဲ့အတွက် သူတို့အရမ်းပျော်ရွှင်နေကြောင်း၊မိသားစုတစ်ခုအဖြစ်နဲ့ အချိန်တွေကိုသေချာကုန်ဆုံးနေကြောင်းနဲ့ အမေများနေ့မှာတင်ထားတာဖြစ်တဲ့အတွက် သူမရဲ့အမေနဲ့အတူ ကမ္ဘာပေါ်မှာရှိသမျှအမေတွေအားလုံးအတွက် ဆုတောင်းစကားလေးကိုလည်းရေးသားထားပါတယ်။
ပြီးခဲ့တဲ့ဇန်နဝါရီလတုန်းက သူတို့နှစ်ယောက်ဟာ အငှားကိုယ်ဝန်နဲ့ ကလေးယူမဲ့အကြောင်းကြေညာပြီး ပရိသတ်တွေကို အကြီးကြီးအံ့ဩအောင်လုပ်ခဲ့တာပါ။ပြီးခဲ့တဲ့ဧပြီလကတော့ ကလေးရဲ့နာမည်ဟာ Malti Marie ဖြစ်ကြောင်းကြေညာခဲ့ပြီး ကလေးလေးရဲ့ပုံကိုတော့ အခုမှပထမဆုံးပရိသတ်တွေဆီချပြတာဖြစ်ပါတယ်။