Copy ကူးတယ်ဆိုပြီး စွပ်စွဲခံနေရတဲ့ လီဆာရဲ့ Rockstar MV

မကြာသေးခင်ကထွက်လာတဲ့ လီဆာရဲ့သီချင်းအသစ် Rockstar ဟာဆိုရင် တုံ့ပြန်မှုကောင်းတွေအများကြီးရထားတာဖြစ်ပါတယ်။ MV ပါရိုက်ကူးထားပြီးတော့ လူထုအာရုံစိုက်မှုကိုရနေတဲ့ဒီဗီဒီယိုဟာ ကူးချထားတယ်ဆိုပြီးစွပ်စွဲခံနေရပါတယ်။ Travis Scott ရဲ့သီချင်းဗီဒီယိုတွေကိုရိုက်ကူးခဲ့တဲ့ ဒါရိုက်တာကနေပြီးအခုလိုမျိုးစွပ်စွဲလာခဲ့တာဖြစ်ပါတယ်။ 

လန်ဒန်အခြေစိုက်ဒါရိုက်တာတစ်ယောက်ဖြစ်တဲ့ Gabriel Mosesကနေပြီး သူ့ရဲ့အင်စတာဂရမ်ကနေတစ်ဆင့် လီဆာရဲ့ MV ဟာသူ့ဖန်တီးမှုတစ်ခုကိုကူးထားကြောင်းတင်လာခဲ့တာဖြစ်ပါတယ်။ သူဖန်တီးထားတဲ့ ဗီဒီယိုဟာ လီဆာရဲ့သီချင်းမထွက်ခင် သုံးလအလိုမှာတင်ထားတာဖြစ်ပြီးတော့ အသုံးပြုတဲ့အရောင်တွေ ပုံစံတွေတူညီနေတာကြောင့်အခုလိုမျိုးကူးချတယ်ဆိုပြီးစွပ်စွဲလာတာဖြစ်ပါတယ်။     

ဗီဒီယိုထဲကတူညီမှုတွေကို သူ့ရဲ့ပရိတ်သတ်တစ်ယောက်ကနေပြီး အီးမေးလ်ပို့တာကြောင့် စစ်ကြည့်ရင်းသိသွားတာလို့ Gabriel Moses ကပြောခဲ့ပါတယ်။ သူ့အနေနှင့် လကုန်အထိအချိန်ပေးထားပြီးတော့ လီဆာရဲ့အဖွဲ့ဖက်ကနေပြီးဖြေရှင်းပေးမှာကိုစောင့်နေတယ်လို့သတိပေးထားပါတယ်။ တစ်ကယ်လို့လုံလောက်တဲ့ရှင်းပြချက်မရှိရင် တရားစွဲဆိုသွားနိုင်ခြေရှိပါတယ်။