လှပတဲ့အသွင်အပြင်လေးနှင့်မလိုက်ဖက်တဲ့အဆိပ်တွေကိုပိုင်ဆိုင်ထားတဲ့ Lily-Of-The-Valley

Lily-Of-The-Valley ပန်းတွေဟာ သူတို့ရဲ့လှပတဲ့အသွင်အပြင်နှင့်ရနံ့တွေကြောင့်နာမည်ကြီးပြီးတော့ ဈေးလည်းမြောက်တဲ့ပန်းတွေဖြစ်ပါတယ်။ ဒီပန်းပွင့်တွေဟာ နှင်းစက်လေးလိုမျိုးတွဲလောင်းကျနေတဲ့အပွင့်လေးတွေကြောင့်နာမည်ကြီးတဲ့အပြင် တော်ဝင်မင်းသားမင်းသမီးတွေရဲ့မင်္ဂလာလက်ကိုင်ပန်းတွေဖြစ်ခဲ့ဖူးတာကြောင့်ပါနာမည်ကြီးပါတယ်။

ဒါပေမဲ့ ဒီ Lily-Of-The-Valley ပန်းလေးဟာ ပြင်းထန်တဲ့အဆိပ်တွေကိုလည်းပဲပိုင်ဆိုင်ထားပါတယ်။ သူ့ဆီမှာရှိတဲ့ glycosides ဓာတ်တွေဟာ နှလုံးကိုရုတ်တရက်ပြင်းထန်စေပြီးတော့ နှလုံးရပ်တာမျိုးအထိဖြစ်သွားစေနိုင်ပါတယ်။ အပင်ရဲ့အနီရောင်ဘယ်ရီသီးလေးတွေဟာဆိုရင်တော့ စားမိရင် အသက်ပါသေဆုံးသွားစေနိုင်တာဖြစ်ပါတယ်။

တစ်ခြားအဆိပ်ရှိအပင်တွေလိုပဲ ဒီပန်းပွင့်တွေကိုလည်းရှေးခေတ်တုန်းကဆေးဖက်ဝင်အပင်အနေနှင့်သတ်မှတ်ပြီးတော့ အသုံးပြုခဲ့ကြပါတယ်။ ဒါပေမဲ့ သိပ္ပံပညာနှင့်လေ့လာမှုတွေအရတော့ ဒီအပင်ဟာလူသားတွေအတွက်အကျိုးဖြစ်စေတဲ့ အကြောင်းတစ်စုံတစ်ရာကိုတွေ့ရှိခြင်းမရှိပါဘူး။