ပေါ်တူဂီနိုင်ငံမှာပဲ မြင်တွေ့နိုင်တဲ့ အကြီးမားဆုံးရေလှိုင်းကြီးများ

များသောအားဖြင့် လှိုင်းစီးချင်တဲ့သူတွေဟာ ဟာဝိုင်အီ နှင့်ဩစတေးလျကမ်းခြေတွေကိုပဲတွေးမိကြပေမဲ့ ကမ္ဘာပေါ်မှာအမြင့်ဆုံးဖြစ်တဲ့လှိုင်းတွေကိုတော့ ပေါ်တူဂီနိုင်ငံမှာပဲတွေ့နိုင်တာဖြစ်ပါတယ်။ ဒီလှိုင်းတွေဟာ ပေါ်တူဂီနိုင်ငံရဲ့မြို့တစ်မြို့ဖြစ်တဲ့ Nazare ရဲ့ကမ်းခြေတွေမှာတွေ့ရတာဖြစ်ပါတယ်။ 

ဒီရေလှိုင်းတွေမြင့်တက်နေရတဲ့အကြောင်းရင်းကတော့ ဥရောပမှာအကြီးဆုံးလို့သတ်မှတ်နိုင်တဲ့ Nazare  ချောက်ကမ်းပါးရှိနေတာကြောင့်ဖြစ်ပါတယ်။ ချောက်ကမ်းပါးရဲ့တည်ရှိမှုဟာ Nazare ကမ်းခြေကလှိုင်းတွေကို ပေတစ်ရာလောက်အထိမြင့်တက်သွားစေတာဖြစ်ပါတယ်။ ဒီအမြင့်ဟာ ကမ္ဘာပေါ်ကတစ်ခြားနေရာတွေမှာတွေ့ရဖို့မလွယ်ကူတဲ့ အမြင့်အတိုင်းအတာရှိတဲ့လှိုင်းလုံးကြီးတွေဖြစ်ပါတယ်။

ဒီအမြင့်ဆုံးလှိုင်းလုံးကြီးတွေကိုကြည့်ဖို့အတွက် လူပေါင်းများစွာဟာ Nazare  မြို့ကိုအလည်အပတ်လာရောက်ကြပါတယ်။ ဒါ့အပြင် Nazare  မြို့ကမ်းခြေတွေဟာ အတော်လေးနာမည်ကြီးတာကြောင့် ဒီလှိုင်းလုံးကြီးတွေအပြင် အားလပ်ရက်အတွက် ကောင်းမွန်တဲ့ကမ်းခြေအဖြစ်ပါသတ်မှတ်ခံထားရတာဖြစ်ပါတယ်။