ဒေါသထွက်ပေါက်ကွဲလွယ်တတ်တဲ့အကျင့်စရိုက်ရှိသူတွေအနေနှင့် ဒီပြဿနာကိုထိန်းချုပ်တတ်ဖို့လိုအပ်ပါတယ်။ ဒါကိုထိန်းချုပ်ဖို့အတွက် လုပ်ဆောင်နိုင်တဲ့နည်းလမ်းတွေကိုဖော်ပြပေးသွားပါမယ်။ အရင်ဆုံးဒေါသထွက်စရာကိစ္စလိုမျိုးကြုံတွေ့လာတာနှင့် စိတ်အခြေအနေကိုဆန်းစစ်ပြီး ဒေါသထွက်နိုင်တဲ့အခြေအနေကိုသိထားဖို့လိုအပ်ပါတယ်။
Anger Issue ဖြစ်မယ့်အခြေအနေဖြစ်လာရင် အသက်ပြင်းပြင်းရှုပြီး ဖြည်းဖြည်းချင်းလေပြန်ထုတ်တဲ့ အသက်ရှူနည်းလမ်းကို ချက်ချင်းလုပ်ဆောင်သင့်ပါတယ်။ ဒီနည်းလမ်းဟာ ဒေါသထွက်နေတဲ့စိတ်ကိုအတော်လေးငြိမ်သက်သွားစေနိုင်သလို အာရုံကြောတွေကိုလည်းအတော်အသင့်ပြေလျော့သွားစေတာကြောင့်ဖြစ်ပါတယ်။ အသက်ရှူနေရင်း ကိန်းဂဏန်းတွေကိုရေတွက်တာ ဒါမှမဟုတ် တစ်ခြားတစ်ခုခုအကြောင်းတွေးတာမျိုးလုပ်ဖို့လိုပါတယ်။
ဒီလိုလုပ်ခြင်းဟာ အရှိန်အဟုန်နှင့်ဖြစ်နေတဲ့ဒေါသကိုငြိမ်သက်စေပြီးတော့ စိတ်ကိုဆင်ခြင်စဥ်းစားနိုင်ဖို့အချိန်ရစေပါတယ်။ စိတ်ငြိမ်သွားမှ ဒေါသဖြစ်ရတဲ့အကြောင်းရင်းကိုရှာဖွေပြီးတော့ ဖြေရှင်းချက်ထွက်လာဖို့လုပ်ဆောင်သင့်ပါတယ်။