လူတွေသတိမထားမိဘဲ နေ့စဥ်ပြုလုပ်မိရာမှ မျက်စိရောဂါဖြစ်စေနိုင်တဲ့ အလေ့အကျင့်တစ်ခု..

မနက်အိပ်ရာထတဲ့အခါ အများစုက မျက်လုံးကိုလက်နှင့် ပွတ်တတ်ကြပါတယ်။ ဒါ့အပြင် တစ်နေ့လုံး အလုပ်မှာသော်လည်းကောင်း၊ သွားလာလှုပ်ရှားတဲ့အခါမှာသော်လည်းကောင်း မထင်မှတ်ဘဲ လက်နဲ့မျက်လုံးတစ်ဝိုက်ကို ပွတ်မိတတ်ပါတယ်။ ဒါဟာ လူအများစုသတိမထားမိတဲ့ အမှားကြီးတစ်ခုပါပဲ။

Vision Direct မှ ပရော်ဖက်ရှင်နယ် ဝန်ဆောင်မှုပေးသူ Nimmi Mistry က "မျက်လုံးများကို ပွတ်သပ်ခြင်းဟာ ဆိုးကျိုးတွေကို အမှန်တကယ် ဖြစ်စေနိုင်တဲ့အတွက် တတ်နိုင်သမျှ ရှောင်ရှားသင့်ပါတယ်" လို့ လူနာတွေကို သတိပေးခဲ့ပါတယ်။ မျက်ကြည်လွှာကို ခြစ်မိပြီး မျက်လုံးထဲပိုးဝင်တဲ့ထိ ဖြစ်လာနိုင်တာကြောင့် အခုလိုပွတ်သပ်ခြင်းကို ရှောင်ရှားဖို့ သတိပေးခဲ့တာဖြစ်ပါတယ်။ 

2018 သိပ္ပံလေ့လာမှုတစ်ခုအရ Staphylococcus aureus နှင့် Streptococcus တို့ဟာ ကွန်ပျူတာကီးဘုတ်နှင့် မိုဘိုင်းလ်ဖုန်းတွေရဲ့ မျက်နှာပြင်ပေါ် ရှိနေကြပြီး သူတို့ကို မျက်လုံးနဲ့ထိမိလိုက်ရုံနဲ့ မျက်လုံးထဲဝင်သွားပြီး ဘက်တီးရီးယားတွေလို မျက်စိရောဂါတွေဖြစ်စေနိုင်တဲ့အတွက် အထူးသဖြင့် လုပ်ငန်းခွင်ထဲမှာလည်း မျက်လုံးကိုမပွတ်မိဖို့ ဖော်ပြထားပါတယ်။

မျက်စိဟာ အရေးကြီးတဲ့ ခန္ဓာကိုယ်အစိတ်အပိုင်းတစ်ခုဖြစ်တာကြောင့် အထူးဂရုစိုက်ဖို့လိုအပ်ပါတယ်။ အကယ်၍ မျက်လုံးကို မဖြစ်မနေထိတွေ့ရမယ်ဆိုရင်တောင် လက်ဆေးပြီးမှထိတွေ့ဖို့လိုပါတယ်။ သို့မဟုတ် သန့်ရှင်းတဲ့တစ်ရှူးနဲ့ ညင်ညင်သာသာပွတ်သပ်အသုံးပြုလို့ရပါတယ်။