ဆူးပန်းပင်လို့ ခေါ်ကြတဲ့ Datura stramonium သည် Solanaceae မျိုးစိတ်ရဲ့ အဆိပ်ရှိသော ပန်းပင်တစ်မျိုးပဲ ဖြစ်ပါတယ်။ အမေရိကအလယ်ပိုင်းမှာ စတင်တွေ့ရှိခဲ့ပြီး ကမ္ဘာတစ်ဝှမ်းရှိ သမပိုင်းရာသီဥတု နဲ့ အပူပိုင်းရာသီဥတုတို့မှာ ကျယ်ပြန့်စွာ တွေ့ရပါတယ်။ ပေါင်းပင်တစ်မျိုးဖြစ်ပြီး မွှေးပျံ့သော အနံ့ရှိပေမဲ့
လူတို့ အဆိပ်မိပါက မူးမေ့ခြင်း ၊ အပူလွန်ကဲခြင်း ၊ နှလုံးခုန်နှုန်းမြန်ဆန်ခြင်း ၊ ဆီးမထိန်းနိုင်ခြင်း ၊ သွေးကြောပေါက်ပြီး မျက်လုံးသူငယ်အိမ်ကျယ်လာခြင်း ၊ ပျို့အန်ခြင်း တို့ ဖြစ်လာနိုင်ပါတယ်။
အမြင့် ၆၀ မှ ၁၅၀ စင်တီမီတာ ( ၂ ပေ မှ ၅ ပေ ) အထိကြီးထွားပြီး ချုံပုတ်များကဲ့သို့ အစုလိုက်အပြုံလိုက် ပေါက်ရောက်ကြပါတယ်။ အမြစ်သည် အဖြူရောင်အမျှင်များနဲ့ ရှည်လျားပြီး ထူထပ်ကာ ပင်စည်မှာ အကိုင်းအခက်များအဖြစ် အထပ်ထပ်ခွဲထွက်နေပါတယ်။ ၈ မှ ၂၀ စင်တီမီတာ ( ၃ - ၈ လက်မ ) ရှိသော အရွက်များသည် ခါးသော အရသာရှိပြီး ဆေးဖက်ဝင်အဖြစ်လည်း သုံးတတ်ကြပါသေးတယ်။ ဆောင်းရာသီမှာ အပွင့်ကြွေ သေဆုံးကြပြီး ကျန်ရာသီများမှာ ကျယ်ပြန့်စွာ ပွင့်တဲ့ Datura stramonium တို့ဟာ သူတို့ရဲ့အပွင့် ထက် အစေ့က ပိုပြီး အဆပ်ရှိ အဆိပ်ပြင်းပါတယ်တဲ့။
အရွက်အပေါ်မျက်နှာပြင်မှာ အစိမ်းရင့်ရောင် နဲ့ အောက်ဘက်က အစိမ်းဖျော့ဖျော့တို့ရှိပြီး အချွန်အထက်တွေနဲ့ ဘဲဥပုံအစေ့ဟာ ထိမိတာနဲ့ လူနှင့်တိရစ္ဆာန်များကို အဆိပ်သင့်စေပြီး သေဆုံးတဲ့ထိ ဖြစ်စေပါတယ်။ မြက်ပင် ၊ မြက်ခြောက် ၊ စပါးတို့ နဲ့ ရောပြီး ပေါက်ရောက်တတ်တာမို့ တိရစ္ဆာန်များ စားမိကာ အဆိပ်မိတာပဲ ဖြစ်ပါတယ်။ လူများအတွက်သာမက တိရစ္ဆာန်များအတွက်ပါ အဆိပ်သင့်စေတာကြောင့် ဖျက်စီးသင့်တဲ့ ပေါင်းပင်မျိုးစိတ်ပဲ ဖြစ်ပါတယ်။