နိုင်ငံရေး တက်ကြွလှုပ်ရှားသူတစ်ဦးဖြစ်သလို အနုပညာဥာဏ်ကြွယ်ဝတဲ့ လူရွှင်တော် ဦးဇာဂနာကတော့ ယမန်နေ့က အသက် ၆၁ နှစ်ပြည့် ပျော်ရွှင်စရာ မွေးနေ့ရက်မြတ်လေးကို ကျရောက်ခဲ့ပါတယ်။ လူအများရဲ့ လေးစားချစ်ခင်ရတဲ့ သူတစ်ယောက်ဖြစ်လို့ အနုပညာရှင်မောင်နှမတွေနဲ့ ချစ်တဲ့ ပရိသတ်တွေကလည်း ဦးဇာဂနာရဲ့ မွေးနေ့လေးအတွက် ဆုတောင်းမေတ္တာတွေ ပို့သပေးကြတာ တွေ့ရပါတယ်။
ဦးဇာဂနာရဲ့ လူမှုကွန်ယက်မှာတော့ သူ့ရဲ့ မွေးနေ့လေးအတွက် ဆုတောင်းပေးကြတဲ့ သူတွေကို ကိုယ်စီကိုယ်ငှ ကျေးဇူး တင်ရှိကြောင်းကို ပြောလာတဲ့အပြင် ဧပြီလ၂၄ ရက်တုန်းက အချုပ်ခန်းထဲရှိစဥ် အိန္ဒြာကျော်ဇင်အတွက် မွေးနေ့ဆုတောင်းပေးခဲ့တာလေးကို အမှတ်ရပြီး ပြန်လည်ပြောပြထားခဲ့ပါတယ်။ ဒါ့အပြင် မွေးနေ့လေးမှာ သူ့အတွက်မလိုဘဲ အခြားသူတွက် ဆုတောင်းပေးထားတာလေးလည်း လေးစားစရာ ကောင်းလှပါတယ်။
ဦးဇာဂနာ ဟာ (၁၉၈၈) ခုနှစ် အရေးတော်ပုံကာလကစလို့ ယခု (၂၀၂၁) ခုနှစ်အထိ နိုင်ငံရေး တက်ကြွစွာလှုပ်ရှားခဲ့တာကြောင့် (၅)ကြိမ်အထိ ဖမ်းဆီးထိန်းသိမ်းခံခဲ့ရသူပါ။ ပြီးခဲ့တဲ့ ဧပြီလက ဖမ်းဆီးခံရပြီး အင်းစိန်ထောင်ထဲမှာ ၅ လကျော် ချုပ်နှောင်ခံရတာ ဖြစ်ပါတယ်။ သူ့ရဲ့ မွေးနေ့တွေကိုလည်း အများဆုံးထောင်ထဲမှာပဲ ဖြတ်သန်းခဲ့ရတာ ဖြစ်ပါတယ်။ ဒီလို ပြည်သူတွေအတွက် အနစ်နာခံခဲ့ရတဲ့ ဦးဇာဂနာရဲ့ အသက် ၆၁ နှစ်ပြည့် မွေးနေ့လေးကို ပရိသတ်တွေကလည်း ဆုတောင်းစကားတွေ ပြောပေးခဲ့ပါဦးနော်...။
သတင်း အရင်းအမြစ်៖ Source - U Zarganar