Gulf sturgeon ငါးတွေကတော့ Acipenser oxyrinchus မျိုးစိတ်က ဆင်းသက်လာပြီး သိပ္ပံအခေါ်ကတော့ Acipenser oxyrinchus desotoi လို့ ခေါ်ပါတယ်။ Sturgeon မျိုးစိတ်ခွဲ နှစ်မျိုးအနက်မှ တစ်မျိုးဖြစ်ပြီး ဖလော်ရီဒါပြည်နယ် အနောက်ဘက်ကမ်းရိုးတန်းရှိ Suwannee မြစ်မှ မစ္စစ္စပီမြစ်အထိ ၊ မက္ကဆီကိုပင်လယ်ကွေ့ရဲ့ အလယ်ပိုင်း နဲ့ အရှေ့ပိုင်းရှိ ပင်လယ်ရေပြင်များတစ်လျှောက်မှာ တွေ့ရလေ့ ရှိပါတယ်။ ၁၉၅၅ ခုနှစ်မှာ ပညာရှင် ဗလာဒီကော့က ပထမဆုံးအကြိမ် တရားဝင်ဖော်ပြခဲ့ပြီး အပြင်ပိုင်းအားဖြင့် Gulf sturgeon တွေဟာ Atlantic sturgeon တွေနဲ့ တူညီကြပါတယ်။
ရုတ်တရက်ကြည့်မယ်ဆို ခွဲခြားရခက်နိုင်တဲ့ ဒီမျိုးစိတ်နှစ်ခုမှာ သိသာထင်ရှားတဲ့ ခြားနားချက်ကတော့ သူတို့ရဲ့ သရက်ရွက် အရှည်ပဲ ဖြစ်ပါတယ်။ Gulf sturgeon ရဲ့သရက်ရွက်ဟာ Atlantic sturgeon ရဲ့ သရက်ရွက်ထက် ပိုရှည်ကြပါတယ်။ အရွယ်ရောက်ပြီးတဲ့ Gulf sturgeon တွေဟာ ဆောင်းရာသီမှာ ရေထဲက ငါးငယ် ၊ ဖား ၊ ခရု ၊ ကျောရိုးမဲ့ရေနေသတ္တဝါတွေကို စားသုံးကြပြီး ကျန်တဲ့ ရာသီတွေမှာ အစာသိပ်မစားဘဲ ရှင်သန်နိုင်တဲ့ ထူးထူးခြားခြား ငါးမျိုးစိတ်ပဲ ဖြစ်ပါတယ်။ ဒါကြောင့် ဒီငါးတွေရဲ့ ကိုယ်အလေးချိန် နဲ့ အရွယ်အစားဟာ ဆောင်းရာသီမှာ အကောင်အရွယ် အတော့်ကို ကြီးနေတတ်ပြီး နွေရာသီမှာတော့ အနည်းငယ် သေးငယ်သွားတာကို တွေ့ရပါတယ်။
တစ်ကောင်ကို ပေါင် ၃၀၀ ဝန်းကျင် အလေးချိန်ရှိတဲ့ Gulf sturgeon တွေရဲ့ ပျမ်းမျှဘဝသက်တမ်းမှာ ၂၀ နှစ် မှ ၂၅ နှစ်အထိ ရှင်သန်နိုင်ကြပါတယ်။ ထူးခြားပြီး ကြီးမားတဲ့ ခန္ဓာကိုယ်ကြောင့် လူတွေရဲ့ပစ်မှတ် ဖြစ်ခဲ့ရတဲ့ ဒီငါးတွေဟာ စည်းကမ်းမဲ့ငါးဖမ်းမှု ၊ နေရာဒေသဆုံးရှုံးမှုတို့ကြောင့် ၁၉၉၁ ခုနှစ်မှာ UNESCO ရဲ့ မျိုးသုန်းပျောက်ကွယ်တော့မယ့် အန္တာရာယ်နဲ့ ရင်ဆိုင်နေရတဲ့ ငါးမျိုးစိတ်ဝင် တစ်မျိုး ဖြစ်လာပါတယ်။ မျိုးဆက်များ ပြန်လည်ပြန့်ပွားရေးလုပ်ငန်းတို့ကို စနစ်တကျ လုပ်ပေးလျက်ရှိပြီး လက်ရှိမှာတော့ Gulf sturgeon ငါးဖမ်းတာကို တရားမဝင်ကြောင်း ထုတ်ပြန်ထားကြပါတယ်။